ਗੁਰੂ ਨਾਨਕ ਦੇਵ ਜੀ ਆਪਣੀ ਦੂਜੀ ਉਦਾਸੀ ਦੌਰਾਨ ਬਿਦਰ ਪਹੁੰਚੇ, ਜਿੱਥੇ ਉਨ੍ਹਾਂ ਨੇ ਜਲਾਲੁਦਿਨ ਅਤੇ ਯਾਕੂਬ ਅਲੀ ਨਾਲ ਮੁਲਾਕਾਤ ਕੀਤੀ। ਉਨ੍ਹਾਂ ਨੇ ਭਾਈ ਮਰਦਾਨਾ ਜੀ ਦੇ ਨਾਲ ਮੌਜੂਦਾ ਗੁਰਦੁਆਰਾ ਨਾਨਕ ਝੀਰਾ ਸਾਹਿਬ ਵਾਲੀ ਥਾਂ ‘ਤੇ ਵਾਸ ਕੀਤਾ। ਉਸ ਸਮੇਂ, ਬਿਦਰ ‘ਚ ਪੀਣ ਯੋਗ ਪਾਣੀ ਦੀ ਭਾਰੀ ਘਾਟ ਸੀ। ਗੁਰੂ ਜੀ ਨੇ ਦਇਆ ਭਾਵ ਨਾਲ ਪਹਾੜੀ ‘ਤੇ ਚਰਨ ਰੱਖਿਆ ਅਤੇ ਇੱਕ ਪਥਰ ਹਟਾਇਆ, ਜਿਸ ਨਾਲ ਠੰਢੇ ਤੇ ਮਿੱਠੇ ਪਾਣੀ ਦਾ ਚਮਤਕਾਰੀ ਝਰਨਾ ਨਿਕਲ ਪਿਆ। ਇਸ ਝਰਨੇ ਨੂੰ “ਨਾਨਕ ਝੀਰਾ” ਦੇ ਨਾਮ ਨਾਲ ਜਾਣਿਆ ਜਾਂਦਾ ਹੈ। ਗੁਰਦੁਆਰੇ ਵਿੱਚ “ਅੰਮ੍ਰਿਤ ਕੁੰਡ” ਅਤੇ “ਗੁਰੂ ਕਾ ਲੰਗਰ” ਸਥਾਪਿਤ ਹਨ, ਜਿੱਥੇ ਸ਼ਰਧਾਲੂਆਂ ਨੂੰ ਮੁਫ਼ਤ ਭੋਜਨ ਸੇਵਾ ਪ੍ਰਦਾਨ ਕੀਤੀ ਜਾਂਦੀ ਹੈ।